أوله: بسم الله الرحمن الرحيم. حمد جميل بی حد، وشكر جزيل بی عد، أول خالق كونين ورازق ثقلينه كه مخلوقك وجودی آنك جودی بحرندن بر قطره وجمالی پرتوندن بر لمعه در ومصنوعات کائنات ونظام امور ممکنات آنك بریکنه و وارلغنه دلیل قاطع و برهان ساطع در... امام همام حجة الاسلام نور چراغ هدایت و دلیل سبیل ولایت جامع ارکان علم وعمل کنجور کنوز رموز ازل اول معرفت چشمه سنك آب زلال محمد بن محمد الغزالي قدس الله تعالی سره وافاض علی العالمین بره مؤمنیه احیاء دین و طالبینه یقین حاصل اولمق ایچون عالمه علم ارمقلرن اجرا ایلیوب نیجه معتبر کتابلر تألیف وتصنیف ایلدکدنصکره آخر عمرنده عیادت امرنده اجتهاد تام واهتمام تمام کوستروب فصل خطاب اولمق ایچون منهاج العابدین ادلو بر کتاب بلاغت نصاب تدوین ایلدی که...وقتاکه بو دردمند دانی ومستمند جانی إلیاس بن عبد الله النهاني بو کتاب مشکین نقابك جمال پر کمالینی فوائد عقائد اهل سنت بر له مجلی و زخارف اراجف بدعتدن مبرا ومعرا کوردیسه ومسائل روشن دلائل طریق تصوفده کافی و طالب دردمنده شربت شافی و هر معنایه مشار الیه ائمهء دین ایچنده مجمع علیه بولدیسه خاطرنه خطور و خمیرنه عبور ایلدیکه دیبای زیبای عربیدن چقاروب قبای رومی ایله مزین قیله تاکه لسان عربی ده قاصر و زبان ترکیه قادر اولان عاشق صادقلره لباس مألوف و کسوت معروف ایچنده عرض جمال اتدوکی احوالده صورت ألفت کوستروب ازالهء وحشت ایلیه...